Furahia Maisha Blog: Siasa
Breaking News
Loading...
Showing posts with label Siasa. Show all posts
Showing posts with label Siasa. Show all posts

26 May 2017

Profesa Shivji na Wenzake Wafunguka Mazito Kuhusu Uchunguzi Kamati ya Madini

VITA kubwa. Ndivyo unavyoweza kusema baada ya Rais Dk. John Magufuli kuanza kuchukua hatua kali dhidi ya usafirishaji wa mchanga unaodaiwa kuwa na dhahabu.
Baada ya hatua hiyo ya Rais Magufuli, kumeanza kuibuka mambo kadhaa, moja kubwa likiwa ni msafara wa Kamati ya Ulinzi na Usalama ya Mkoa wa Shinyanga ukiongozwa na Mkuu wa Mkoa, Zainab Tellack kuzuiwa kuingia kukagua na kuhesabu dhahabu iliyozalishwa na mgodi wa dhahabu wa Bulyanhulu kwa kipindi cha siku mbili, baada ya Wakala wa Ukaguzi wa Madini (TMAA) kusimamishwa.

Zainabu, alikuwa katika ziara ya kawaida kukagua wingi za dhahabu iliyozalishwa katika migodi iliyopo mkoani kwake, baada ya Rais Magufuli kusimamisha kazi watendaji wa TMAA.
Akizungumza na waandishi wa habari jana, Zainabu alisema kutokana na TMAA kuondolewa, waliamua kufanya ukaguzi migodini kujua ni nini kipo na kimezalishwa wakati ili kuhakikisha usalama wa madini hayo.
Alisema alichukua uamuzi huo kuepuka udanganyifu  hadi wataalamu wengine watakapopatikana kwa kazi ya ukaguzi.
“Tulifanikiwa kufika mgodi wa Buzwagi, tulikagua na kupima kiasi cha dhahabu kilichokuwapo na kuhesabu… tulipofika mgodi wa Bulyanhulu tuliingia ila hatukufunguliwa strong room (chumba cha kuhifadhia dhahabu) kama Buzwagi kwa madai wanafunga kwa muda (time lock), tulikubaliana kesho (leo), lakini nimeamua kuweka askari wa kulinda hapo mpaka kesho (leo),” alisema.
Alisema hawezi kuacha wawekezaji hao wakazalisha dhahabu bila ya kuwa na wakaguzi kama taratibu zinavyoelekeza, kwa kuwa wanaweza kuzalisha na kusafirisha wakati ambao hakuna wakaguzi.
“Labda niwaambie Watanzania, dhahabu yetu ipo salama, tumekagua na kujihakikishia walichozalisha kwa kuhesabu na kupima, waliposema hatuwezi kuingia, nimeweka ulinzi wa Serikali,” alisema.
 
ACACIA WAFAFANUA
Meneja Mawasiliano wa Kampuni ya Acacia ambayo ndiyo wamiliki wa mgodi wa dhahabu wa Bulyanhulu, Nekta Foya, akizungumza na MTANZANIA jana, alisema Mkuu wa Mkoa alifika na kupokewa vyema katika mgodi wa Bulyanhulu na kupewa ushirikiano wote hadi kuingia ndani ya chumba cha dhahabu (gold room), lakini hakuingia katika sefu ya dhahabu kutokana na muda aliofika kuwa imejifunga.
“Unajua kwa ajili ya usalama, unaweza kuingia chumba cha dhahabu, usifike kwenye dhahabu kwa kuwa hufungwa kwa muda maalumu kutokana na mipango ya uzalishaji, sasa muda ambao amefika mfumo wetu wa usalama (time lock) wa sefu ya dhahabu, ulikuwa umejifunga, usingeweza kufunguka hadi kesho (leo),” alisema.
Alisema baada ya kufahamishwa na maofisa wao waliokuwapo, RC Zainabu alikubalina nao na kupanga kuendelea kesho na ukaguzi wake, lakini kutokana na kutaka uhakika zaidi aliacha askari kulinda eneo hilo.
 
YAPINGA RIPOTI YA KAMATI
Katika hatua nyingine, Acacia imepinga ripoti ya Kamati ya Profesa Abdulkarim Mruma iliyoundwa na Rais, Magufuli kuchunguza makontena 277 yenye mchanga wa dhahabu, ikisema haikutangaza madini yote yaliyokuwa katika makanikia inayosafirisha kwenda nje ya nchi.
Ikumbukwe Rais Magufuli aliunda kamati mbili kuchunguza kiwango cha madini kilichomo katika makontena hayo ya mchanga yaliyokuwa yakisafirishwa kwenda nje ya nchi kuyeyushwa kupata masalia baada ya mchakato wa kwanza kuondoa dhahabu mgodini.
Kamati hiyo iliyokabidhi ripoti yake Ikulu juzi iliongozwa na Profesa Abdulkarim Mruma ambaye alisema makontena yaliyozuiwa katika Bandari ya Dar es Salaam yana tani 7.8 za dhahabu yenye thamani ya kati ya Sh bilioni 676 na Sh trilioni 1. 147.
Katika taarifa yake kwa vyombo vya habari Dar es Salaam jana, Ofisa Mtendaji Mkuu wa Kampuni ya Acacia, Brad Gordon, alisema kamati hiyo haikutangaza madini yote yaliyokuwa katika makanikia kwamba kutokana na hilo, amri ya kuyazuia kusafirishwa nje kubakia palepale.
“Hatukubaliani na matokeo ya tume ambayo inaeleza kuwa madini yaliyo katika mchanga uliopo katika makontena yana thamani zaidi ya mara 10 ya kiwango tulichotangaza.
“Tuna imani na usahihi wa taarifa zetu ambazo zilikaguliwa na kutathiminiwa na SGS, ambayo ni moja ya kampuni kubwa kabisa duniani za upimaji,”alisema Gordon.
Ofisa huyo wa Acacia, alisema makanikia wanayozalisha yana kiwango kidogo cha madini na kila kontena lina kiwango tofauti cha wingi wa makanikia, lakini wanaamini kila kontena lina wastani wa kilo 3,000 za shaba, tatu za dhahabu na kilo tatu za fedha.
Alisema kwa pamoja madini hayo yana thamani ya Sh milioni 300 kwa kila kontena.
“Pia tumeorodhesha kampuni huku mapato yetu yakikaguliwa kikamilifu na PWC, ambayo inathibitisha kwamba daima tuko wazi kwa kila kitu tunachofanya.
“Mapato tunayotangaza katika mahesabu yetu yaliyokaguliwa yanaendana na kiwango cha dhahabu tunachotangaza kuzalisha na kuuza.
“Iwapo kiwango cha dhahabu katika makanikia yetu kitaendana na matokeo ya tume, itamaanisha kwamba migodi ya Bulyanhulu na Buzwagi inazalisha dhahabu nyingi kuliko mgodi wowote ule duniani. Kwa bahati mbaya sana uhalisia hauko hivyo.
“Nakubali kwamba wakati matukio kama ya jana yanapotokea, huleta hali ya sintofahamu na kuwafanya watu wahoji na wamwamini nani. Nataka kuwahakikishia kwamba Acacia ilitangaza kikamilifu kila kitu kwa mujibu wa thamani halisi tunayozalisha.
“Pia tunalipa mirabaha inayotakiwa na kodi kwa madini yote yanayohusika ambayo tunazalisha na kwamba usafirishaji wa makanikia hufanyika kwa mujibu wa sheria za Tanzania na makubaliano ya kisheria tuliyonayo na Serikali ya Tanzania.
“Wakati tukiwa tumesikiliza hotuba za jana (juzi) na taarifa kwa vyombo vya habari ni hadi pale tutakapopokea ripoti nzima vinginevyo ni vigumu kwetu kutoa maelezo ya kina au kutoa uamuzi kuhusu kiwango na thamani inayohusu makanikia ya Acacia kwa mujibu wa ripoti ya tume, lakini ninarudia, tunaamini juu ya kiwango tulichotangaza.
“Kuhusu mirabaha alisema Serikali hupokea mirabaha ya asilimia nne ya madini ya dhahabu, fedha na shaba iliyopo katika makanikia.
“Acacia imekuwa ikilipa mirabaha na kuna ukaguzi wa kuthibitisha hilo. Madini mengine katika makanikia hayo ni yale yasiyo na thamani katika soko kutokana na kiwango cha udogo wake na gharama za kuyachenjua huzidi thamani na hivyo hakuna mrabaha,”alisema ofisa huyo wa Acacia.
Wakati Kampuni ya Acacia ikisema hivyo, timu ya Wanasheria Watetezi wa Mazingira kwa Vitendo (LEAT), ilitoa mapendekezo kadhaa kwa Serikali huku ikiitaka kuzidai kampuni zote malimbikizo ya kodi na mrabaha wa madini ambayo hazikuyataja katika taarifa zao tangu zilipoanza uchimbaji hapa nchini.
Taarifa hiyo pamoja na mambo mengine imependekeza Katiba ya nchi ifanyiwe marekebisho na kutamka wazi kuwa Tanzania ndiyo mmiliki wa milele wa rasilimali zake zote za asili.
Mkurugenzi Mtendaji wa LEAT, Dk. Rugemeleza Nshala, alisema kuna mfumo mbaya wa ukaguzi na mikataba ya madini ambao unaruhusu kampuni kushiriki katika udanganyifu wa bei.
“Serikali ifute leseni za uchimbaji kwa kampuni za madini ambazo zimeshiriki katika udanganyifu huu. Tunatoa rai kwa Serikali hatua zote za kisheria za kuvunja mikataba zifuatwe kwani uzoefu wetu katika kesi ya City Water unatuasa kufuata kwa umakini taratibu za kuvunja au kusitisha mikataba.
“Iundwe idara madhubuti ya wanasheria ndani ya Serikali wanaohusika na masuala ya gesi, petroli, madini na mikataba yote ipitiwe kuona udhaifu wake,” alisema Dk Nshala.
Aidha LEAT inaishauri Serikali kushiriki katika uchimbaji wa madini kupitia kampuni zake na iwe na hisa katika kampuni mama zinazochimba madini huku ikitolea mfano nchi ya Botswana ambayo ilikuwa na asilimia 15 ya hisa katika kampuni ya ubia kati yake na De Beers.
Dk. Nshala alisema Tanzania inapaswa ijitoe katika mikataba ya usuluhishi na migogoro ya kimataifa kwani inapingana na maazimio namba 1803 ya mwaka 1962 na namba 3281 ya mwaka 1974.
Alisema migogoro yote inayohusiana na uchimbaji madini kati ya serikali na kampuni za nje za madini itatatuliwa na mahakama za ndani na si mabaraza ya usuluhishi kwa madai kuwa yalianzishwa kulinda masilahi ya kampuni za kigeni.
Kuhusu kodi, mwanasheria huyo alipendekeza sheria ya kodi irekebishwe na kuweka vifungu vya kuzuia udanganyifu wa bei na kufuta nafuu zote za uwekezaji za uchimbaji madini zilizo katika sheria ya mabadiliko ya sheria mbalimbali za fedha namba 27 ya mwaka 1997 na sheria ya mauzo ya mwaka 1976 kwani zimebariki kuporwa kwa madini.
“Yale ambayo kamati imeyabaini ni mambo ambayo LEAT ilikuwa ikiyasema kwa sauti kubwa lakini yalipokelewa kwa kejeli na uongozi wa Serikali zilizopita zikiungwa mkono na kampuni za madini kwa kuwaita wanaharakati wenye ajenda ya siri dhidi ya wawekezaji,” alisema.
Kwa mujibu wa mkurugenzi huyo baada ya malalamiko ya wadau, Benki ya Dunia iliikopesha Serikaliya Tanzania Dola za Marekani milioni 56 kufanya mabadiliko katika Sheria ya Madini ya 1998 na kuandikwa sheria nyingine mwaka 2010.
Alisema sheria hiyo ya 2010 haina tofauti na ile ya 1998 isipokuwa kuanzishwa kwa bodi ya ushauri ya madini na waziri kuchukua nafasi ya kamati ya ushauri na kushauri ipitiwe upya.
PROFESA MOSHI
Mhadhiri wa Uchumi katika Chuo Kikuu cha Dar es Salaam (UDSM), Profesa Humphrey Moshi, akitoa maoni yake jana alisema kosa kubwa lililofanywa na Serikali ni kufungua milango ya wawekezaji katika sekta ya madini bila kuwa na uwezo wa kuwadhibiti.
“Nilitarajia ripoti itaonesha matokeo hayo na hili nililizungumza tangu mwaka 2002, kwamba mikataba mingi haipo wazi hivyo ni rahisi sana kuwa na makandokando.
“Tulifungua milango ya kukaribisha wawekezaji bila hata kuwa na uwezo wa kuwadhibiti, hili ni kosa kubwa. Wawekezaji walipewa masharti ambayo ni nafuu mno. Serikali ikutane na wawekezaji wote na wakubaliane kwamba lazima mikataba ipitiwe upya,” alisema Profesa Moshi.
PROFESA SHIVJI
Mhadhiri Mstaafu wa Chuo Kikuu cha Dar es Salaam (UDSM), Profesa Issa Shivji, aliandika katika ukurasa wake wa Twitter jana akisema Serikali ilikosa njia ilipopitisha sheria ya madini mwaka 1998.
“Tulikosa njia tulipopitisha sheria ya madini ya mwaka 1998 iliyofanya mikataba iwe na nguvu zaidi kuliko sheria. Tukajifunga pingu. Nani wa kulaumu?,” alihoji Profesa Shivji.
LHRC
Kaimu Mkurugenzi Mtendaji wa Kituo cha Sheria na Haki za Binadamu (LHRC), Anna Henga, alisema mwaka 2014, walitoa ripoti na kuiomba Serikali ichungunze na kuichukulia hatua Wakala wa Madini Tanzania (TMAA), lakini hawakusikilizwa.
“Tumeridhishwa na hatua zilizochukuliwa japo ni kwa kuchelewa. Mwaka 2014 tulitoa ripoti yetu na maoni yetu kuhusu mikataba ya madini na tukaiomba Serikali iichunguze TMAA lakini hawakutusikiliza ni wakati sasa wa kupitia upya mikataba yote ya madini,”alisema Henga.
CCM: Rais akaze buti
KATIBU wa Itikadi na Uenezi wa Chama Cha Mapinduzi(CCM), Humphrey Polepole alisema kwamba Rais Magufuli anapaswa kuungwa mkono kwa sababu vita hii ya uchumi aliyoingia ni ngumu kuliko ile ya kutumia silaha.
Watanzania kwa pamoja wanapaswa kuungana ili kuhakikisha kuwa viongozi au watu wanaohujumu uchumi wa nchi wanakomeshwa na kuchukuliwa hatua.
Wakati huo huo Umoja wa Vijana wa chama hicho (UVCCM) umeishauri serikali kupitia upya mikataba yote ya madini ili kubaini kama ina manufaa kwa taifa ama laa.
Kaimu Katibu Mkuu wa UVCCM, Shaka Hamdu Shaka wakati akitoa tamko la umoja huo jana alisema pamoja na jitihada zinazofanywa na Rais Magufuli kuzuia utoroshaji wa madini lakini pia kama kuna viongozi waliohusika wachunguzwe mali zao na ikibidi zitaifishwe.
“Tumeishauri serikali kutaifisha mali za viongozi na watendaji ambao watabainika kumiliki mali, utajiri, na vitega uchumi ambavyo havilingani na vipato vyao kama ilivyofanyika mwaka 1967 baada ya kutangazwa kwa Azimio la Arusha ,” alisema Shaka.

Simulizi Lote=> Lipumba Alivyomfuata Lowassa na Kumpa Salamu Msibani

WAZIRI Mkuu wa zamani, Edward Lowassa na Mwenyekiti wa Chama cha Wananchi (CUF) anayetambuliwa na Msajili wa Vyama vya Siasa nchini, Profesa Ibrahim Lipumba wamekutana ana kwa ana kwenye mazishi ya mwanasiasa mkongwe na Meya wa zamani wa Jiji la Dar es Salaam, Kitwana Kondo (KK) aliyefariki dunia akiwa na umri wa miaka 92.
Mazishi hayo yalifanyika jana na aliyekuwa wa kwanza kufika nyumbani kwa marehemu Upanga, alikuwa Profesa Lipumba, ambapo baada ya muda aliingia Lowassa na kuamua kwenda kukaa kiti cha nyuma.

Tukio hilo liliwakutanisha wanasiasa hao ambao waliachana Julai 21, mwaka 2015 wakati wa harakati za Uchaguzi Mkuu baada ya Lowassa kujiunga na Chadema na kuridhiwa kuwa mgombea urais wa chama hicho na kuungwa mkono na vyama vinavyounda Umoja wa Katiba ya Wananchi (Ukawa).
Hata hivyo baada ya swala ya maiti, Lipumba alimfuta Lowassa na kwenda kumsalimia huku waombolezaji waliofika msibani hapo wakibaki kuwaangalia wanasiasa hao ambao sasa wamekuwa wakirushiana maneno.
Baada ya kusalimiana na kukaa pamoja wanasiasa hao wakati wakijiandaa kuelekea msikitini na kisha katika makaburi ya Tambaza,  Prof. Lipumba alionekana kila wakati akizungumza na Lowassa pamoja na mwanasiasa mkongwe Kingunge Ngombale Mwiru.
Viongozi wengine waliokuwapo msibani hapo ni Rais mstaafu wa Awamu ya Pili Alhaji Alli Hassan Mwinyi, Waziri wa zamani wa Ulinzi, Edger Majogo, Kingunge Ngombale Mwiru, Balozi Juma Mwapachu na Katibu Mkuu wa Chama Cha Mapinduzi (CCM), Abdurhman Kinana.
Wabunge wa zamani wa Kinondoni, Peter Kabisa na Idd Azzan, Meya wa Jiji la Dar es Salaam, Isaya Mwita, Meya wa zamani Kinondoni,  Salum Londa, aliyekuwa Naibu Waziri wa Fedha, Adam Malima na Mbunge wa Bunge la Afrika Mashariki, Adam Kimbisa.
Alhaji Mwinyi
Rais Mstaafu Alhaji Hassan Mwinyi,  alisema marehemu Kitwana Kondo, alikuwa mtu mwema, mcheshi na mwenye roho ya kipekee kiasi cha kwamba hata mtu akiwa na dhiki ya rohoni akifika kwake ni lazima atapoa.
“Ni mkweli hapendi kudanganya mtu na hata kama ana njaa hawezi kukaa kimya anafika ofisini kwako na kukwambia naomba kazi yoyote nipate fedha nile,’’ alisema Rais Mwinyi.
Lowassa
Kwa upande wake Lowassa alisema Kitwana Kondo alishirikiana naye katika mambo mengi hasa ya kiserikali katika kujenga nchi. “Alikuwa mcheshi mwenye kupenda kila mtu,” alisema.
Lowassa alimwomba Meya wa Jiji la Dar es Salaam, Isaya Mwita kutenga barabara moja na kuiita jina la Kitwana Kondo ‘KK’.
Kwa upande wake Kingunge alisema marehemu alikuwa rafiki yake na kaka yake pia walijuana miaka mingi na kwamba amefanya mengi kwa ajili ya wakazi wa Dar es Salaam.
Kinana
Katibu Mkuu wa CCM , Abdulrahman Kinana alisema Kitwana Kondo,  alikuwa ni zaidi ya kiongozi wa wakazi wa Dar es Salaam na aliyejaaliwa uungwana.
“Alikuwa ni mtu aliyejaaliwa uungwana maarifa  na lugha nzuri asiyependa maneno maneno ya kusema sema, bingwa wa Kiswahili kizuri na alifanikiwa kufanya kazi na Serikali katika awamu mbalimbali,’’ Kinana.
Awali aliyewahi kuwa Mbunge wa Kisarawe, Athuman Janguo,  alisoma wasifu wa Kitwana Kondo  na kusema kuwa ameshinda nafasi mbalimbali ikiwemo kuwa Inspekta wa Jeshi la Polisi na aliyefanya kazi kwa weledi.
Alisema aliwahi kuwa Mbunge wa Kigamboni na pia aliwahi kuwa Meya wa Jiji la Dar es Salaam.
“Kabla ya nafasi hizo aliwahi kupitia sehemu mbalimbali ikiwemo bodi ya Korosho, Bandari na maeneo mengine mbalimbali,’’ alisema.
Janguo alisema marehumu Kitwana Kondo, alianza kuugua mwaka 2013 kwa kusumbuliwa na shinikizo la damu  na baadaye kupata ugonjwa wa kiharusi kwa muda wa miaka mine ambapo alikuwa mahututi hadi mauti yalipomkuta juzi.

6 May 2017

Yaliyomkuta Slaa CHADEMA, Yamkuta Kinana CCM. Chama hakijautaja muda ambao ameruhusiwa kupumzika

CHAMA Cha Mapinduzi (CCM), kimesema kimempa mapumziko ya muda ambao hakijautaja Katibu Mkuu wake, Abdulrahman Kinana.
Kwa mujibu wa Katibu wa Itikadi na Uenezi wa CCM, Humphrey Polepole, kiongozi huyo ameruhusiwa kupumzika ili kuangalia afya yake hadi hapo itakapoimarika.
Polepole alitoa kauli hiyo jana, alipokuwa akifanya majumuisho ya ziara yake iliyolenga kukagua uhai wa CCM mkoani hapa, ikiwa ni eneo linalotajwa kuwa ngome ya chama kikuu cha upinzani, Chadema.
Kauli hiyo ya Polepole imekuja ikiwa ni muda sasa Kinana hajaonekana hadharani, hatua ambayo imezusha maneno mengi, huku baadhi wakienda mbali na kuhusisha kitendo hicho na mgomo kutokana na uamuzi wa Serikali ya Rais Dk. John Magufuli kumvua uwaziri wa Habari, Vijana Sanaa na Michezo ‘kijana wake’, Nape Nnauye.
Kuwapo kwa hisia za namna hiyo kunatokana na kile ambacho CCM ilidai kuwa ni uvumi, kwamba Kinana alitaka kuitisha mkutano na wanahabari siku moja baada ya Nape kuondolewa kwenye wadhifa huo na saa chache baadaye wakati akielekea kuzungumza na vyombo vya habari kutishiwa kwa bastola na mtu ambaye haijajulikana anafanya kazi wapi.
Ni wakati huo Rais Magufuli alilazimika kuzungumzia mahali alipo Kinana, akisema alikuwa amemtuma kwenda nchini India kwa ajili ya matibabu.
Rais Magufuli alitoa ufafanuzi huo wakati akiwaapisha Mawaziri Profesa Palamagamba Kabudi kuwa Waziri wa Katiba na Sheria na Dk. Harrison Mwakyembe aliyechukua nafasi ya Nape.
Akitoa ufafanuzi kuhusu afya ya Kinana, baada ya kuulizwa swali na Mwandishi wa MTANZANIA aliyetaka kujua ukimya wa Kinana na kutoonekana kwa kipindi kirefu, Polepole alisema wamekubaliana achukue muda wa kutosha ili kutazama afya yake, baada ya kufanya shughuli nyingi za chama na serikali.
Imezoeleka kiongozi yeyote anapougua viongozi wenzake kwenda kumjulia hali hospitalini anakopatiwa matibabu au nyumbani kwake, lakini kwa Kinana imekuwa ni tofauti.
Hadi sasa hakuna picha yoyote inayomwonyesha kiongozi au mtu yeyote amefika nyumbani kwa Kinana kwa ajili ya kumjulia hali, jambo ambalo limezidi kuzua maswali.
 “Hili swali la Katibu wetu Mkuu ndugu Komrade Abdulrahmani Kinana limesemwa sana na mimi ninafurahi kwamba tunaanza kurejesha utamaduni ambao maisha ya viongozi wetu yanakuwa sehemu na maslahi ya umma wa Watanzania,” alisema Polepole na kuongeza:
“Lakini unapoona Katibu wetu Mkuu wa CCM anaulizwaulizwa yuko wapi na hata watu wasiokuwa wana CCM, hii inaonyesha kiwango cha imani cha Watanzania kinarejea kwa kasi kubwa, hasa katika kipindi hiki tunapofanya mageuzi makubwa ndani ya chama chetu. 
“Na kwa hakika najua viongozi wa vyama vingine wasioonekana hawauliziwi na mtu yeyote, kwetu sisi ni dalili njema sana. Nipende tu kuwaambia jana nimeongea na Komrade Kinana bado yuko kwenye mapumziko ya kujitizama afya yake.
“Ninyi wote ni mashahidi mzee wetu huyu alifanya kazi kubwa ndani ya CCM na kwenye Serikali na pia kwenye wigo wa kimataifa, hasa Jumuiya ya Afrika ya Mashariki.
“Lakini amefanya kazi kubwa zaidi kwenye chama ya kukijenga na kukiimarisha, hasa kwenye uongozi na utendaji kama Mtendaji Mkuu wa Chama.
“Leo labda niseme kwa sehemu mpaka wakati tunamaliza Mkutano Mkuu Maalumu ambao ulipitisha marekebisho na mabadiliko ya Katiba Ndugu Komrade Kinana alikuwa anafanya yote haya, lakini akiwa mgonjwa, akiugulia na sisi kwenye chama tuna utaratibu na tunawapenda viongozi wetu.
“Kwa hiyo ikakubalika achukue muda wa kutosha wa kuitazama afya yake nje ya nchi na kiongozi wa aina yake anaporejea, mgonjwa akitoka hospitali hakimbilii kazini au shambani moja kwa moja, inashauriwa kitaalamu atumie muda wa kupumzika ili kuimarisha afya yake.
“Na jana (juzi) nimezungumza naye anaendelea vizuri, yuko madhubuti kabisa kuliko jana, kwa hiyo nashukuru wale wote wanaofuatilia habari zetu za CCM na iwe mfano kwa vyama vingine,” alisema. 
Mbali na hilo, Polepole pia alizungumzia hali ya siasa katika Mkoa wa Arusha, akisema baada ya kufanya ziara yake hiyo amebaini kuwa tofauti na miaka michache iliyopita, chama hicho sasa ni bora na madhubuti.
“Nina furaha kuwa chama chetu sasa baada ya kufanya uamuzi wa kuondoa wale wote ambao walikuwa wamekosa uadilifu, wala rushwa na wabadhirifu wa mali za CCM, hali ya uhai ni bora na madhubuti kuliko jana.
“Uongozi wa awamu ya tano umejikita katika kurejesha nidhamu na uadilifu serikalini na ndani ya chama, hatuna ajizi katika kuchukua hatua ya kukisafisha chama chetu kwa kuwaondoa viongozi na wanachama wote waliofanya uzembe, wabaguzi, wanaopendelea kwa misingi ya dini na ukabila,” aliongeza Katibu wa Itikadi na Uenezi.
 Polepole alisisitiza agizo la CCM kwa serikali kuhakikisha kuwa inapeleka chakula kitakachouzwa kwa bei nafuu kwa wakazi wa wilaya za Longido, Monduli na Ngorongoro.

 

Gallery